Friday - 2018 july 20
Languages
دوستوں کو بھیجیں
News ID : 189970
Published : 12/10/2017 17:27

جناب زینب(س) اور نماز شب

یہ اس وقت کی بات ہے جب امام حسین(ع) زندہ تھے اور آپ سر زمین کربلا پر تھیں لیکن بعد حسین(ع)جب ظالمین آپ کو اسیر کر کے کربلا سے کوفہ اور کوفہ سے شام لے جا رہے تھے تو کیا آپ نے نماز شب اور دیگر عبادتوں کو جاری رکھا؟ جی ہاں! ایسے سخت ماحول میں بھی آپ نے اپنے مالک سے راز و نیاز کے سلسلہ کو منقطع نہیں کیا۔

ولایت پورٹل:جناب زینب سلام اللہ علیہا کے پابند نماز شب ہونے کا اندازہ، امام حسین(ع) کے اس فقرہ سے لگایا جا سکتا ہے جو امام(ع)نے رخصت ہوتے وقت فرمایا تھا:«يا أختاه لا تنسيني في نافلة الليل»۔(1)
ترجمہ:اے بہن مجھے نماز شب میں فراموش نہ کرنا۔
امام(ع) یہ اپنی بہن سے التماس نہیں کر رہے ہیں بلکہ دنیا والوں کو جناب زینب  سلام اللہ علیہا کے عابدۂ شب زندہ دار ہونے کی اطلاع دے رہے ہیں۔
حضرت زینب سلام اللہ علیہا کے سلسلہ میں، دختر امام حسین(ع) (فاطمہ) سے نقل ہوا  کہ انہوں نے فرمایا:اس رات میری پھوپی استغاثہ میں  مشغول تھیں اور اس رات ہم میں سے کوئی بھی نہیں سویا اور نہ ہی کسی کے نالہ و شیون کی صدا قطع ہوئی:«و روي عن ابنة أخيها فاطمة بنت الحسين قولها:«وأما عمتي زينب فإنها لم تزل قائمة في تلك الليلة في محرابها تستغيث الى ربها فما هدأت لنا عين ولا سكنت لنا رنة  »۔(2)
یہ اس وقت کی بات ہے جب امام حسین(ع) زندہ تھے اور آپ سر زمین کربلا پر تھیں لیکن بعد حسین(ع)جب  ظالمین آپ کو اسیر کر کے کربلا سے کوفہ اور کوفہ سے شام لے جا رہے تھے تو کیا آپ نے نماز شب اور دیگر عبادتوں کو جاری رکھا؟ جی ہاں! ایسے سخت ماحول میں بھی آپ نے اپنے مالک سے راز و نیاز کے سلسلہ کو منقطع نہیں کیا،جس کی وضاحت خود امام سجاد(ع) اس طرح فرماتے ہیں:«ان عمتی زینب کانت تؤدی صلواتھا من قیام الفرائض و النوافل الخ۔۔۔»
میری پھوپی زینب  سلام اللہ علیہا کوفہ و شام کے اس پر مشقت راستہ اور سفر میں اپنی واجب اور مستحب  نمازوں کو بھی کھڑی ہوکر اور کبھی بیٹھ کر پڑھتی تھیں اور یہ کیفیت ان میں بھوک کی بنا پر پیدا ہوگئی تھی کیونکہ تین راتیں ہو چکی تھیں کہ جو کھانا ان کو دیا جاتا تھا، آپ اس کو بچوں کو کھلا دیتی تھیں کیونکہ وہ سنگ دل لوگ ہم کو ہر شب و روز میں ایک روٹی سے زیادہ نہیں دیتے تھے۔(3)
یہ روایات جہاں حضرت زینب  سلام اللہ علیہا کی بندگی و اطاعت کی بلند مثال ہمارے سامنے پیش کرتی ہیں وہیں ان کے عظیم رتبہ کا بھی پتہ دیتی ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حوالہ جات:
1۔ أدب الطف ،جواد شبر ج 1 ص 242 .
2۔  زينب الكبرى ،النقدي ،ص 62 .
3۔ كتاب «زينب الكبرى» للشيخ جعفر النقدي ، ص 59 .

الاسوہ


آپکی رائے



میرا تبصرہ ظاہر نہ کریں
تصویر امنیتی :
Friday - 2018 july 20